Në datën 4 mars në Lubjanë u organizua tryezë e rrumbullakët kushtuar bashkëpunimit të Shqipërisë me Slloveninë. Bashkëorganizatorë ishin Ambasada e Shqipërisë dhe ECPD, Institut Ndërkombëtar për Zhvillim të Qëndrueshëm, Planifikim Urban dhe Studime Mjedisore. Tryeza që prej përgatitjes deri në realizimin e saj ka patur mbështetje të plotë të europarlamentarit slloven Franc Bogovič. Si veprimtari e parë e këtij lloji, ajo u shoqërua me interes të veçantë jo vetëm nga autoritete të institucioneve sllovene, por sidomos nga përfaqësues të bisnesit e të shoqërisë civile në Slloveni. Gjatë veprimtarisë, në sesione të veçanta u u trajtuan çështjet e thellimit të bashkëpunmit ekonomik, procesi i integrimit evropian të Shqipërisë dhe roli i Sllovenisë në këtë aspekt, projektet zhvillimore sllovene në Shqipëri, si dhe shkëmbimet kulturore, të artit e të fushës së arsimit si mjet i përshtatshëm për të thelluar bashkëpunimin edhe në fusha të tjera, sidomos në atë ekonomike.

Prania e autoriteteve sllovene nga ministri të ndryshme, si ajo e jashtme, e arsimit, dhoma ekonomike dhe agjensia sllovene e investimeve, përfaqësues të bisnesit vendas, por edhe njerëz të dijes e të shkencës shënuan vlerë të shtuar në këtë ngjarje. Të ftuar nga Ambasada e Shqipërisë për të marrë pjesë dhe për të kontribuar në tryezën e rrumbullakët ishin edhe Genti Beqiri, drejtor i AIDA, Anila Dollani, Ministria e Integrimit Evropian dhe Përparim Kalo, Kalo & Associates.

Pjesëmarësit i përshëndetën ambasadori Pëllumb Qazimi, eurodeputeti Franc Bogovič, drejtori i përgjithshëm në ministrinë sllovene të Punëve të jashtme Tomaž Lovrenčič dhe drejtori i ECPD, Janez Podobnik.

Veprimtaria u ndoq nga rreth 60 pjesëmarrës, të cilët përveç ndjekjes me interes ishin edhe aktivë në paraqitje idesh, rekomandimesh dhe propozimesh për projekte konkrete dypalëshe. Mesazhi kryesor i kësaj veprimtarie ishte se ka ardhur koha për një moment të ri në marrëdhëniet ndërmjet dy vendeve, sidomos në aspektin ekonomik. Në këtë frymë, u rikonfirmua edhe një herë se Sllovenia është mbështetëse dhe avokate e fortë e rrugëtimit evropian të Shqipërisë. Në përfundimet e veprimtarisë u përcaktuan edhe hapa konkretë për veprim në periudhën aftashkurtër dhe afatmesme. Ndër to mund të përmenden krijimi i këshillit të përbashkët të bisnesit Slloveni-Shqipëri, rritja e kontakteve ndërmjet bisneseve dhe mbështetja dypalëshe institucionale ndaj tyre, takimet dypalëshe për prezantim të mundësisë të investimeve në të dy vendet, vijimi i veprimtarive të Ambasadës për prezantimin e mundësive që paraqet tregu shqiptar, pjesëmarrja në panairet respektive në të dy vendet, fillimi i praktikës të binjakëzimit të qyteteve, etj. Ndërkohë, me interes u vlerësua përfshirja e të dy vendeve në projekte të përbashkëta me financim nga fonde të BE-së, sidomos ato në kuadrin e strategjisë të makrorajonit Adriatiko-Jonian, vijimi me projekte zhvillimore sllovene në Shqipëri në disa fusha. Fusha e arsimit, shkencës, kulturës, por edhe fusha të tjera së shpejti do të shënojnë zhvillime pozitive, sidomos me përgatitjen e protokollit dypalësh në fushën e arsimit, riaktivizimin e bashkëpunimit ndërmjet dy agjensive të punës kërkimore dhe shkencore, nënshkrimin e marrëveshjes dypalëshe në fushën e zhvillimit urban, etj. Arti, kultura, shkenca u konsideruan si urë e efektshme që nxit edhe bashkëpunimin në fushën ekonomike.

Pjesëmarrësit, sidomos njerëzit e bisnesit kanë vlerësuar me nota vërtetë shumë pozitive tryezën e zhvilluar. Gjatë saj u krijuan mundësi të krijimit të kontakteve e të komunikimit, gjë që lehtëson punën në të ardhmen.

Tryeza e rrumbullakët, për Ambasadën e Shqipërisë përfaqëson një arritje konkrete në fushën e dipomacisë publike dhe ekonomike. Vlerat e saj shtohen, pasi veprimtaria erdhi si rrjedhojë e bashkëpunimit me institutin slloven ECPD, duke patur edhe mbështetjen e drejtpërdrejtë të europarlamentarit Franc Bogovič. Ambasada e Shqipërisë falënderon dhe shpreh mirënjohje ndaj të gjithë pjesëmarrësve, gjithë kontribuesve dhe në veçanti ndaj europarlamentarit Franc Bogovič, drejtorit të ECPD Janez Podobnik, por edhe për KULT 3000 dhe sponsorizuesit e veprimtarisë si Sava Re, Nusi foundation, etj.

https://www.facebook.com/permalink.php?story_fbid=966207510100382&id=713...