Në datën 12 dhjetor, Qendra për Perspektivë Evropiane në Slloveni, organizoi debatin »Alternativa për Ballkanin Perëndimor?«. Folësit kryesorë, zyrtarë sllovenë, ambasadorë dhe drejtues institutesh studimore nga Franca dhe Italia dhanë kontributin e tyre në këtë veprimtari. Ideja dhe qëndrimi kyç i shprehur nga të gjithë panelistët dhe pjesëmarrësit ishte se »Alternativa e vetme e zhvillimit dhe prosperitetit për vendet e Ballkanit Perëndimor është integrimi në Bashkimin Evropian«. Alternativat e tjera shfaqen vetëm nëse vetë BE do të tregohet e vonuar dhe jo aktive, ashtu sikundër vendet e Ballkanit Perëndimor nuk do të kenë progres. BE duhet të ushtrojë përgjegjësitë e saj në këtë aspekt, ndërsa vendet e Ballkanit Perëndimor duhet të përmbushin detyrat e tyre. Franca nuk kundërshton integrimin evropian të Ballkanit Perëndimor, por ka kërkuar qasje të re, që të jetë e orientuar nga rezultatet. Të gjithë kontribuesit insistuan që minimalisht në muajin mars të jepet sinjali pozitiv për hapjen e bisedimeve të anëtarësimit me Shqipërinë dhe Maqedoninë e Veriut dhe kjo të ofrohet në Samitin e Zagrebit të muajit maj 2020. Në veprimtari ishte i pranishëm edhe ambasadori Pëllumb Qazimi, i cili foli për përjetimin në Shqipëri të mos hapjes të bisedimeve të anëtarësimit. Ai ka theksuar se e vetmja alternativë për Shqipërinë është integrimi në familjen evropiane dhe pa realizuar këtë, si për Shqipërinë, ashtu edhe për vendet e rajonit, projekti i bashkimit të kontinentit nuk është i përfunduar.