Në kuadër të vizitës në Greqi të Kryetarit të Kuvendit të Republikës së Shqipërisë, z. Niko Peleshi, Ambasada e Republikës së Shqipërisë në Greqi organizoi në Athinë një mbrëmje të veçantë, e cila mblodhi së bashku përfaqësues të trupit diplomatik, parlamentarë, sipërmarrës dhe personalitete të jetës politike, akademike, kulturore e shoqërore nga të dy vendet.

Më shumë se një aktivitet protokollar, kjo mbrëmje u konceptua si një hapësirë takimi dhe komunikimi mes njerëzve që kontribuojnë në forcimin e marrëdhënieve shqiptaro-greke. Në një kohë kur diplomacia publike merr gjithnjë e më shumë rëndësi në ndërtimin e partneriteteve të qëndrueshme, aktivitete të tilla krijojnë mundësi konkrete për shkëmbim idesh, ndërtim besimi dhe zgjerim të bashkëpunimit.

Gjatë mbrëmjes u theksua rëndësia e dialogut si themel i marrëdhënieve të mira mes vendeve dhe popujve, si edhe roli i bashkëpunimit ndërinstitucional dhe shoqëror në përballimin e sfidave të përbashkëta dhe shfrytëzimin e mundësive të reja.

Vëmendje e veçantë iu kushtua komunitetit shqiptar në Greqi, i cili përbën një nga shembujt më të qartë të lidhjeve të forta njerëzore mes dy vendeve. Kontributi i tij në jetën ekonomike, sociale dhe kulturore të Greqisë, si dhe roli i tij në afrimin e shoqërive tona, mbetet një vlerë e rëndësishme për të ardhmen e marrëdhënieve shqiptaro-greke.

Nëpërmjet nismave të tilla, Ambasada e Republikës së Shqipërisë në Greqi vijon të promovojë një diplomaci të hapur, gjithëpërfshirëse dhe të orientuar drejt njerëzve, duke forcuar urat e komunikimit dhe bashkëpunimit ndërmjet dy vendeve.

Marrëdhëniet mes kombeve ndërtohen nga njerëzit që zgjedhin dialogun.