Në ambientet e selisë së Komunitetit Shqiptar në Greqi u zhvillua një bisedë e veçantë letrare, ku shkrimtarë, publicistë dhe miq të autorit u mblodhën për të reflektuar mbi përjetimet e një artisti që ka sfiduar kohën dhe jetën përmes artit të tij.

Në qendër të këtij takimi ishin dy libra të rëndësishëm: “Arëza”, një pasqyrim i thellë i sfidave dhe kujtimeve të një artisti, dhe “Brezi i artë i aktrimit”, një studim mbi plejadan e aktorëve shqiptarë që kanë lënë gjurmë në historinë e skenës.

Nën moderimin e Brikena Qamës dhe recensionet e Karafil Shenës, Spartak Tilit, Marsela Lenës, Alma Hysit dhe vetë autorit Miho Gjini, u vlerësua puna dhe kontributi i tij në botën e letrave. Znj. Eliverta Radomi, diplomate e Ambasadës Athinë, theksoi se Miho Gjini nuk iu tremb sfidave të jetës, por i përballoi ato me dinjitet, duke punuar për të ruajtur kujtesën kulturore dhe për të vlerësuar figurat që kanë shënjuar artin shqiptar.

Ky aktivitet ishte një mundësi e vyer për të ndarë mendime, për të reflektuar mbi jetën dhe artin, si dhe për të ndjerë fuqinë e fjalës dhe kujtesës kolektive.