Presidenti i Republikës, Sh.T.Z. Bajram Begaj, priti Kryetarin e Dhomës së Deputetëve të Parlamentit të Kanadasë, z. Anthony Rota.
Presidenti Begaj vlerësoi vizitën e Kryetarit Rota si një moment të rëndësishëm për marrëdhëniet dypalëshe midis Shqipërisë dhe Kanadasë. Ajo përkon me kremtimet e 35-vjetorit të marrëdhënieve diplomatike midis dy vendeve.
Duke nënvizuar marrëdhëniet shumë të mira e miqësore të konsoliduara edhe më shumë në dy dekadat e fundit, Presidenti Begaj vlerësoi ecurinë e dialogut politik si dhe partneritetin e ngushtë në kuadër të aleancës në NATO.

Në datë 28 shtator 2022, z. Ermal Muça, Ambasador i Republikës së Shqipërisë në Otavë, zhvilloi një takim me z. Anthony Rota, Kryetar i Dhomës së Komunëve. Bashkëbiseduesit u fokusuan në zhvillimin e marrëdhënieve midis Shqipërisë dhe Kanadasë, si edhe thellimin e mëtejshëm të këtyre marrëdhënieve, përfshirë përmes diplomacisë parlamentare.

Gjatë samitit të NATO-s në Madrid, Ministrja Për Evropën dhe Punët e Jashtme, Olta Xhaçka, zhvilloi takime dypalëshe me Ministren e Punëve të Jashtme të Kanadasë, Melanie Joly dhe Ministren e Punëve të Jashtme të Suedisë, Ann Linde.
Ministrja Xhaçka i shprehu mirënjohjen homologes kanadeze për partneritetin dhe miqësinë e fortë mes Kandasë dhe Shqipërisë.
Kryediplomatja Xhaçka falenderoi Ministren Ann Linde për mbështetjen e Suedisë ndaj procesit të integrimit të Shqipërisë në Bashkimin Evropian.

Ministrja për Evropën dhe Punët e Jashtme, Olta Xhaçka, kryesoi debatin e nivelit të lartë të Këshillit të Sigurimit mbi agjendën “Gratë, Paqja dhe Siguria”, ku morën pjesë përfaqësues të lartë të OKB, UN WOMEN, OSBE, BE etj.
Xhaçka theksoi se ngjarjet e fundit nëpër botë kanë ndikuar në mënyrë drastike në perspektivat për organizatat e grave, duke çuar edhe në ndërprerjen e angazhimeve konkrete për këtë agjendë.