Gjatë përshëndetjes së tij në mbrëmjen festive të organizuar nga Shoqata e Bashkësisë Shqiptaro-Kanadeze për nder të 109 vjetorit të Pavarësisë së Shqipërisë dhe me rastin e 5 vjetorit të miratimit të ligjit për shpalljen e nëntorit Muaj i Trashëgimisë Shqiptare në Ontario, Ambasadori Muça vuri në dukje se komuniteti shqiptaro-kanadez përbën një urë të fortë dhe të qëndrueshme ndërmjet Shqipërisë dhe Kanadasë dhe luan një rol të rëndësishëm për ruajtjen dhe promovimin e vlerave tona kombëtare në Kanada.

Me rastin e 109 vjetorit të Pavarësisë së Shqipërisë dhe ndërsa festojmë Muajin e Trashëgimisë Shqiptare në ON, është zhvilluar ceremonia e ngritjes së Flamurit Kombëtar në Asamblenë Legjislative të Ontarios.

Në Ditën Kombëtare të Përkujtimit ambasadori Muça ka vënë një kurorë në emër të Republikës së Shqipërisë pranë Memorialit të Luftës në Otava, në nderim të kujtimit, veprës dhe sakrificës sublime të të rënëve dhe veteranëve.

Takimet letrare të organizuara virtualisht nga Shoqëria e Ekselencës Shqiptaro-Kanadeze në koordinim me ambasadën, synuan promovimin e leximit në gjuhën shqipe, veçanërisht ndër brezin e ri, si edhe njohjen më nga afër të veprës së autorëve shqiptaro-kanadezë dhe letërsisë shqipe, si një lidhje e fortë me gjuhën dhe identitetin tonë kombëtar.