Me rastin e 110 vjetorit të Pavarësisë së Shqipërisë, u zhvillua në Bashkinë e Otavës, ceremonia e ngritjes së flamurit kombëtar shqiptar.

Të pranishmit i përshëndeti z. Ermal Muça, Ambasador i Shqipërisë në Kanada, dhe znj. Heidi Kutz, Drejtore e Përgjithshme për Arktikun, Evropën dhe Euroazinë pranë Departamentit të Punëve të Jashtme, Tregtisë dhe Zhvillimit të Kanadasë.

Krahas urimeve për 110 vjetorin e Pavarësisë së Shqipërisë që këtë vit përkoi edhe me 35 vjetorin e vendosjes së marrëdhënieve diplomatike ndërmjet Shqipërisë dhe Kanadasë, u vlerësua zhvillimi i marrëdhënieve të forta ndërmjet dy vendeve, si edhe angazhimi i përbashkët për thellimin e mëtejshëm të tyre.

Znj. Kutz vlerësoi, krahas të tjerash, përparimin e Shqipërisë në rrugën e integrimit të plotë në Bashkimin Evropian, si edhe rolin aktiv të vendit tonë si anëtar jo i përhershëm i Këshillit të Sigurimit të OKB.

Më pas, së bashku me z. Adriatik Kryeziu, Ambasador i Republikës së Kosovësnë Kanada, ata ngritën flamurin shqiptar nën tingujt e Himnit Kombëtar, pasuar nga “O Canada”.

Ceremonia vijoi në ambientet e ambasadës së RSH në Otava ku performoi në violinë studentja shqiptare Vasilika Vangjeli.