Sot pranë Misionit të Republikës së Shqipërisë në Bashkimin Europian në Bruksel, me ftesë të Ambasadores Suela Janina, u zhvillua një takim pune me ambasadorët e vendeve të rajonit dhe perfaqesues te DG NEAR, për të diskutuar mbi zhvillimin e takimit të Ministrave të Punëve të Jashtëm, të mbajtur në Durrës, më 30-31 mars dhe përgatitjet për Samitin e Parisit që do të zhvillohet më 4 korrik.

Pjesëmarrësit në këtë takim theksuan rëndësinë e procesit të Berlinit për intensifikimin e  procesit të integrimit europian të Ballkanit Perëndimor.  U diskutua ecuria e realizimit të 'soft measures' në secilin vend, për të mundësuar investimet e Komisionit Europian në axhendën e konektivitetit në fushën e transportit dhe tregut të përbashkët të energjisë.

Zyrtarët e Komisionit Europian vlerësuan organizimin e suksesshëm nga vendi ynë të Takimit të Ministrave të Jashtëm të WB6 në Durrës dhe inkurajuan vijimin e plotësimit të angazhimeve të marra nga vendet e rajonit deri në Samitin e Parisit, me qëllim arritjen e rezultateve konkrete dhe të prekshme për të gjithë qytetarët tanë. 

Ambasadorët vlerësuan pozitivisht këtë iniciativë për informim dhe shkëmbim pikëpamjesh ndërmjet misioneve të vendosura në Bruksel dhe theksuan nevojën e vijimësisë së këtij formati duke shfrytëzuar momentin pozitiv të marrëdhënieve të ngushta të bashkëpunimit rajonal.