Ministri i Punëve të Jashtme të  Republikës së Shqipërisë, Z. Ditmir Bushati, priti sot në takim Ministrin e Punëve të Jashtme të Republikës italiane, Z. Paolo Gentiloni.

Të dy Ministrat shprehën kënaqësinë për nivelin e shkëlqyer të marrëdhënieve dhe të bashkëpunimit mes dy vendeve.

Ministri Bushati vlerësoi mbështetjen që ka dhënë dhe jep Italia në procesin e integrimit evropian të vendit tonë, atë të bashkëpunimit rajonal në frymën e Procesit të Berlinit, si dhe e falënderoi homologun Gentiloni për gatishmërinë për të vazhduar nxitjen e mëtejshme të këtij bashkëpunimi. 

Nga ana e tij, Ministri Gentiloni u shpreh se Italia do të vijojë të mbështesë fuqishëm Shqipërinë pranë vendeve anëtare për hapjen e negociatave për anëtarësim në BE gjatë javëve dhe muajve në vijim.

Dy Ministrat evidentuan se bashkëpunimi mes Italisë dhe Shqipërisë ka qenë tepër i suksesshëm në hapësirën Adriatike dhe mund të përbëjë një model në përballimin e krizave me të cilat ballafaqohet sot BE-ja. Në këtë kontekst, u diskutua dhe mbi krizat me të cilat përballet sot kontinenti dhe veçanërisht me atë të valës së refugjatëve.

Ministrat u ndalën gjithashtu dhe në trajtimin e aspekteve të sigurisë energjetike në rajon, ku evidentuan se në vijim të takimit trepalësh mes Shqipërisë, Italisë dhe Serbisë të zhvilluar në fillim të këtij viti, është e domosdoshme që ecuria dhe mbarëvajtja e projekteve energjetike rajonale të trajtohet dhe në formate të tilla.

Gjatë takimit u diskutua mbi zhvillimet më të fundit në rajon ku Ministri Bushati u ndal në anëtarësimin e Kosovës në UNESCO dhe theksoi se Shqipëria inkurajon mbështetjen e Italisë në këtë drejtim.

Konferenca e përbashkët e dy Ministrave

MPJ Ditmir Bushati: Përshëndetje! Është bërë zakon besoj për çdo ministër të jashtëm që kur pret homologun Italian të ndihet i gëzuar dhe natyrisht ky është edhe rasti im. Jam realisht i gëzuar dhe i lumtur që sot ministri i jashtëm i Italisë Paolo Gentiloni viziton Tiranën dhe me këtë rast patëm mundësinë që të shkëmbenim pikëpamjet në lidhje me marrëdhëniet tona dypalëshe të cilat vlerësohen jo vetëm strategjike por edhe të një niveli jashtëzakonisht të lartë.

Në këtë kontekst, pata mundësinë që të falënderoj edhe njëherë tjetër ministrin Gentiloni, qeverinë italiane, institucionet italiane për mbështetjen e pakursyer që i kanë dhënë Shqipërisë në procesin e integrimit Evropian dhe sidomos në projektet e ndryshme që zbatohen nga agjenci italiane në Shqipëri.

Gjithashtu, jam i inkurajuar nga mbështetja italiane për vazhdimësinë e hapave të mëtejshëm të Shqipërisë në këtë proces.  Siç dihet, objektivi ynë i radhës është përmbushja e atyre kritereve dhe standardeve  që do t’i krijonin Shqipërisë mundësinë që në bashkëpunim me Komisionin Evropian dhe vendet anëtare, të shkonte drejt fillimit të procesit për anëtarësim. Në këtë kontekst, jemi përpjekur që së bashku me ministrin e jashtëm të Italisë Gentiloni të skicojmë disa nga  etapat që duhen përmbushur nga ana e Shqipërisë në këtë drejtim.

Së dyti, patëm mundësinë që të bisedojmë edhe për zhvillimin e formave të ngjashme siç kemi rënë dakord dhe siç kemi zhvilluar trilateralin e parë ndërmjet Shqipërisë, Italisë dhe Serbisë në fusha dhe në  tematika më specifike  që janë në interes jo thjesht të tri vendeve tona por edhe në perspektivë të bashkëpunimit rajonal dhe në përshpejtimin e procesit të integrimit evropian edhe në kuadër të prioriteteve të përcaktuara nga i ashtuquajturi Proces i Berlinit, ku ne si Shqipëri jemi jashtëzakonisht të lumtur e ku Italia do të jetë një ndër organizuesit e këtij takimi, pas Francës.

E fundit por jo më pak e rëndësishme, pata mundësinë të dëgjoj edhe pikëpamjet e qeverisë italiane nën dritën e zhvillimeve me krizën e refugjatëve me të cilën po përballet sot për sot Bashkimi Evropian, kryesisht me valën e refugjatëve që vijnë nga Lindja e Mesme apo jugu i Mesdheut. Më lejoni që edhe njëherë tjetër që edhe në emër të qeverisë shqiptare të falënderoj ministrin e jashtëm Gentiloni për mbështetjen e vendit të tij por mbi të gjitha edhe atij vetë për bashkëpunimin e shkëlqyer që ekziston mes nesh dhe ekipeve tona respektive.

MPJ Paolo Gentiloni: Faleminderit mikut tim, Ministrit Bushati! Ne jemi vende të afërta gjeografikisht, vende fqinje e mike, e gjithashtu jemi vende që në 20 vitet e fundit kemi qenë protagonistë të një bashkëpunimi pozitiv, i cili ka dëshmuar edhe një mënyrë për të zgjidhur vështirësi apo probleme që janë hasur në kuadrin e emigracionit apo çështjeve me karakter ekonomik. Sigurisht që ka kaluar shumë kohë, por kujtesa na shërben për të dëshmuar e për të rrëfyer sesi përballë krizave, sikundër është ajo me të cilën përballen vende të ndryshme evropiane, rruga më efikase dhe ajo e duhur është bashkëpunimi mes vendeve dhe bashkëpunimi me karakter ekonomik. Ç’ ka ka dhënë një rezultat pozitiv në zonën e Adriatikut mund të jetë efikas edhe në vende të tjera të Evropës, e cila përshkohet tashmë nga flukse emigrantësh.

Italia dhe Shqipëria kanë marrëdhënie të shkëlqyera, dhe jemi me të vërtetë krenarë që jemi partneri i parë tregtar i Shqipërisë. Gjithashtu jemi të angazhuar për të dhënë ndihmesën tonë e për të kontribuar sa më shumë që të jetë e mundur në një ecuri pozitive, dhe nëse është e mundur në përshpejtimin e rrugëtimit të çeljes së negociatave për sa i përket anëtarësimit të Shqipërisë në BE. Sigurisht shërben një angazhim në vend në lidhje me reformat që duhen ndërmarrë, por Evropa nuk mund t’i fshihet faktit që duhet të japë përgjigje ndaj një pyetjeje në mënyrë të shpejtë.

Sigurova mikun tim Ditmir për angazhimin e Italisë në javët e muajin e ardhshëm në nxitjen edhe në nivel ministrash të jashtëm të BE-së dhe mbështetjen sa më të fuqishme të përshpejtimit të rrugëtimit të anëtarësimit dhe të negociatave me Shqipërinë. Gjithashtu folëm edhe në lidhje me krizën e refugjatëve, që ka përfshirë të gjithë kontinentin tonë dhe Italia është tashmë e kënaqur për faktin se për këtë karakter evropian të krizës, më në fund u arrit apo u kuptua nga të gjitha vendet se kjo fillimisht u konsiderua më tepër si një krizë italiane apo greke sesa një krizë evropiane.

Së fundmi, në lidhje me marrëdhëniet tona dypalëshe, edhe të formatit tripalësh që kemi krijuar vitet e fundit mes Italisë, Shqipërisë e Serbisë, ato do të jenë mjaft të rëndësishme, siç do të jenë dhe çështjet me karakter energjetik. Në Itali janë duke nisur punimet për Gazsjellësin TAP, i cili do të kontribuojë në diversifikimin e burimeve të energjisë, në mënyrë që t’i japë një zhvillim të dy brigjeve të Adriatikut, të cilët janë aq të dashur për ne.

Edhe njëherë faleminderit Ministrit Bushati për mikpritjen gjatë kësaj vizite timen të shkurtër, e cila sigurisht do të pasohet edhe nga vizita të tjera. Faleminderit!

Pyetje për dy ministrat:

Italia gjithnjë është konsideruar si një avokat i Shqipërisë lidhur me çështjen e integrimit në BE. A do të vazhdojë Italia të kryejë rolin e avokatit edhe për sa i përket hapjes së negociatave, edhe pse tashmë ky proces është i vlefshëm edhe për Serbinë?

A është i vetmi kusht për Shqipërinë reforma në drejtësi për hapjen e negociatave, a mbetet i vetmi angazhim, se brenda vitit 2016 Shqipëria do të hapë negociatat më bashkimin Evropian, apo është duke u formësuar një kusht i ri nga Brukseli, siç është dekriminalizimi, duke pasur parasysh edhe zhvillimet e fundit në vend?

MPJ Paolo Gentiloni:

Italia ka interes që të nxisë këtë proces, pra, do të përpiqemi që ta nxisim e promovojmë në javën e ardhshme edhe në Bruksel, për të bërë të mundur që gjithë vendet e BE-së të bëhen të ndërgjegjshëm e të vetëdijshëm për këtë nevojë, sikundër e theksova edhe më parë, vendet e BP me përjashtim të dy vendeve që tashmë janë anëtare, kanë nevojë për përgjigje; pra është një shtysë drejt Evropës, për të cilën nga ana tjetër duhet të kemi një përgjigje konkrete, dhe Italia sigurisht që do të angazhohet në mënyrë që të çelë rrugën për proceset e tjera.

Për sa i përket çështjes së papërshtatshmërisë të të zgjedhurve, jemi duke bashkëpunuar. Ndër të tjera, di që Ministri i Drejtësisë së Italisë kreu një vizitë në Tiranë dje edhe sot, ndoshta ende ndodhet në Tiranë.

Ne kemi pasur diskutime të mëdha, por më në fund besoj se si gjithmonë kur ka probleme, arrihen gjithsesi përvoja të cilat mund të ndahen me të tjerë. Përvoja që kemi si në lidhje me aspektin legjislativ ashtu edhe atë gjyqësor, ka qenë shumë e dobishme për Italinë dhe besoj se do të jetë e dobishme edhe për Shqipërinë.

Di që Ministri i Drejtësisë italiane ka kryer takime me homologun e tij shqiptar, me Presidentin e RSH-së edhe për këtë çështje. Për sa i përket çështjes së anëtarësimit të Shqipërisë në BE dhe çeljes së negociatave, ne kemi rënë dakord tashmë edhe me Ministrin Bushati për të punuar më fort në 2-3 muajt e ardhshëm.

MPJ Ditmir Bushati: Së pari më lejoni që të falënderoj edhe një herë tjetër Italinë  për mbështetjen e gjithanshme që i jep vendit tonë në procesin e shtet ndërtimit demokratik. Në lidhje me çështjen së cilës ju i referoheni, mos përshtatshmërinë e kandidimit apo mbajtjes së disa funksioneve në jetën publike në vend, siç e tha me të drejtë edhe ministri Gentiloni, është një çështje më të cilën nuk është se përballet për herë të parë apo i pari vend Shqipëria, është një sfidë apo një proces që e kanë kaluar edhe vende të tjera. Besoj së ekziston gjithë vullneti i qeverisë shqiptare, institucioneve shqiptare për të hulumtuar praktikat më efektive, praktikat më të mira, të cilat natyrisht do duhet që të jenë në respekt të plotë të parimeve të shtetit të së drejtës sepse në jemi një shoqëri qe duhet t’i bazojmë edhe arsyetimet tona në synimin e së drejtës. Shqipëria ka objektiv parësor procesin e bisedimeve, të fillimit të bisedimeve për anëtarësim në Bashkimin Evropian, reforma në drejtësi është vetëm një prej kritereve që duhet të përmbushë Shqipëria, pasi ja vlen qe t’i rikujtojmë opinionit publik se janë pesë kritere për të cilët Shqipëria duhet të ketë një përmbushje në nivel të lavdërueshëm në mënyrë që procesi i bisedimit për anëtarësim, dhe këtu dua të theksoj që ky nuk do të jetë një proces 100-metërsh n.q.s. mund ta quaj kështu, është një maratonë e cila duhet më pas të vazhdojë më etapa të tjera për ta kontrolluar gjithë procesin e reformës në drejtësi, në përputhje më kriteret që duhen nga kapitujt 23 dhe 24 të Acquis Communautaire, që janë edhe kapitujt e parë më të cilët përballen vendet kandidatë, ku kemi parë rastin e Malit të Zi, Kroacisë dikur apo edhe rastin e Serbisë në muajt në vijim. Prandaj besojmë fuqimisht që reforma në drejtësi, procesi i lustracionit politik, për të gjithë ato elementë që u përmendën, do të jenë një shtysë përpara për të lehtësuar procesin e fillimit të bisedimeve për anëtarësim. Faleminderit!