Ministrja Gjosha:  Vullnet dhe angazhim maksimal për reformën në drejtësi

Drejtori për Politikat e Zgjerimit, Christian Danielsson: Do regjistrojmë dhe pasqyrojmë objektivisht çdo progres të Shqipërisë

Në datat 8-9 shtator 2015, Ministrja e integrimit Europian, znj. Klajda Gjosha, zhvilloi në Bruksel një vizitë pune, ku takoi zyrtarë të lartë të Komisionit Europian. Takimin e parë Ministrja Gjosha, e zhvilloi me znj. Michela Matuella, Drejtoreshë për Politikat e  Fqinjësinë dhe Zgjerimin, për Shqipërinë dhe Bosnje Hercegovinën, z. Jean Eric Paquet, Drejtorin për Ballkanin Perëndimor në Drejtorinë e Zgjerimit, si dhe ekspertë që mbulojnë ecurinë e  5 prioriteteve të Shqipërisë në Komisionin Europian.

Gjatë takimit, u diskutua mbi punën e bërë për 5 prioritetet ku përfaqësuesit e Komisionit vlerësuan zbatimin e  masave dhe afateve të lëna në udhërrëfyes, si dhe reformat që Shqipëria ka ndërmarrë në funksion të procesit të integrimit.

Duke analizuar secilin prej tyre, ekspertët e Komisionit veçuan prioritetin numër 1, (Krijimi i një administrate profesioniste dhe të depolitizuar) i cili sipas tyre ka rezultate të prekshme mjaft pozitive, por nënvizuan se puna për implementimin e  mëtejshëm të reformës duhet të vazhdojë.

Përfaqësuesit e Komisionit Europian, vunë theksin te domosdoshmëria e reformës në drejtësi, duke e cilësuar si reformën kyçe për të çuar përpara procesin e integrimit.

Ministrja e Integrimit Europian, znj. Klajda Gjosha, shprehu angazhimin maksimal të qeverisë shqiptare dhe vullnetin për të bashkëpunuar me të gjithë aktorët, për të përfunduar sa më shpejt këtë reformë.

“Ky nuk është vetëm një angazhim që qeveria shqiptare e ka marrë përpara partnerëve europianë, Komisionit Europian, por një premtim ndaj qytetarëve shqiptarë për tu rikthyer besimin tek drejtësia. Ne jemi të vetëdijshëm se nuk mund të ecim përpara me procesin e integrimit  pa përfunduar këtë reformë”, tha Ministrja Gjosha.

Znj. Michela Matuella u shpreh se të gjitha reformat që Shqipëria ka nisur janë  me rëndësi madhore, për të transformuar vendin, dhe Komisioni është maksimalisht i angazhuar të evidentojë çdo hap pozitiv, çdo nisëm që i shërben procesit të integrimit.

Z. Jean Eric Paquet, gjithashtu vlerësoi progresin e bërë me reformat dhe nënvizoi domosdoshmërinë e përfundimit të tyre. Gjithashtu z. Paquet u shpreh i impresionuar nga puna e bërë me IPA-n, ku përgëzoi rolin vendimtar të Ministrisë së Integrimit Europian.

Takimi me z. Christian Danielsson, Drejtori Përgjithshëm për Politikat e Zgjerimit dhe Fqinjësisë të BE-së, në Komisionin Europian

Ministjra e Integrimit Europian znj. Klajda Gjosha, zhvilloi një takim me Z. Christian Danielsson, Drejtori i Përgjithshëm për Politikat e Zgjerimit dhe Fqinjësisë të BE-së, në Komisionin Europian.

Në këtë takim u diskutua në lidhje me axhendën e përbashkët të aktiviteteve të qeverisë shqiptare dhe Komisionit, duke nisur nga mbledhja e radhës e grupeve të përbashkëta të punës, tryeza e Dialogut të Nivelit të Lartë e parashikuar në muajin nëntor si dhe një sërë takimesh të tjera që lidhen në mënyrë të drejtpërdrejtë me procesin e integrimit të Shqipërisë.

Ministrja Gjosha bëri përpara z. Danielsson një përmbledhje të punës së bërë për 5 prioritetet dhe reformat e tjera që po ndërmeren, frytet e së cilave do të kenë impakt të drejtpërdrejtë në përmirësimin e ekonomisë së vendit dhe të jetës së qytetarëve.

Z. Danielsson shprehu gatishmërinë e Komisionit Europian për të asistuar Shqipërinë, me ekspertizë për të gjitha fushat ku është e nevojshme.

“Ne do të regjistrojmë dhe do të pasqyrojmë objektivisht, çdo hap pozitiv që Shqipëria hedh me procesin e integrimit, jemi këtu për t’ju ndihmuar, por është në duart tuaja ritmi i reformave për të shtyrë përpara procesin, në mënyrë që vendi të jetë i përgatitur për të kaluar në fazën e radhës”, tha z. Danielsson.

Gjatë takimit u nënvizua rëndësia e reformës në drejtësi për të kaluar në fazën e radhës që është hapja e negociatave dhe nevoja e bashkëpunimit të të gjitha palëve politike për dekriminalizimin e parlamentit.