U zhvillua më 20 janar 2016 në Tiranë takimi i dytë tripalësh i Ministrave të Punëve të Jashtme të Shqipërisë, Ditmir Bushati, Italisë, Paolo Gentiloni dhe Serbisë, Ivica Dacic, në vijim të praktikes së instaluar në Romë në janar 2015.

Në fokus të takimit të sotëm ishin trajtimi i një sërë çështjesh që përbëjnë interes të përbashkët si integrimi evropian, çështjet e sigurisë e migratore dhe siguria energjetike. Në fjalën e tij gjatë konferencës për shtyp, Ministri Bushati u shpreh se qëllimi i këtij takimi ishte konsolidimi i një formati tripalësh bashkëpunimi të nisur vjet në Romë dhe gjetja e emëruesve të përbashkët për të përshpejtuar integrimin e rajonit në BE, në frymën e Procesit të Berlinit dhe në përgatitje të Samiteve të Ballkanit Perëndimor në Paris 2016 dhe Romë 2017.

“Në mënyrë të vazhdueshme, Kryeministri Renzi ashtu edhe MPJ Gentiloni kanë shprehur mbështetjen e palëkundur të zgjerimit në Ballkanin Perëndimor dhe ata kanë mirënjohjen tonë”, u shpreh Ministri Bushati, duke evidentuar marrëdhënien strategjike me Italinë. Duke u ndalur në rrugëtimin evropian të rajonit tonë, Ministri Bushati shprehu mbështetjen për avancimin e mëtejshëm të Serbisë në këtë proces, si dhe uroi që: “falë angazhimit tonë konkret në procesin e reformave shtet-ndërtuese, ky vit të shënojë një hap të rëndësishëm në rrugëtimin tonë evropian”.

Në këtë kontekst, Ministri Gentiloni siguroi homologët e tij se Italia do të mbetet promotore e integrimit të dy vendeve në Bashkimin Evropian. Në këtë kontekst, Italia do të nxisë jetësimin e projekteve të përbashkëta, si në kuadër të Procesit të Berlinit ashtu edhe nëpërmjet fondeve të parashikuara në Strategjinë e BE-së për Makro-rajonin Adriatiko-Jonian.   

Përballimi i BE-së me flukset migratore dhe kërcënimet e përbashkëta si terrorizmi ndërkombëtar dhe ekstremizmi i dhunshëm ishin një tjetër aspekt i diskutimeve tripalëshe. Në këtë drejtim, Ministrat dakordësuan një seri iniciativash për rritjen e kapaciteteve të agjencive ligj-zbatuese të tre vendeve. Duke theksuar se asnjë vend evropian nuk është imun ndaj rrezikut të ekstremizmit të dhunshëm, Ministri Gentiloni evidentoi modelin e bashkëjetesës fetare në Shqipëri dhe rolin e saj si faktor stabiliteti në rajon.

Duke u ndalur në nevojën e zgjerimit të gamës së bashkëpunimit tripalësh në fusha si siguria energjetike, rendi, tregtia dhe bashkëpunimi rinor, Ministrat konfirmuan aktivizimin e grupeve të ekspertëve për jetësimin e projekteve të përbashkëta. Ministri Dacic u shpreh se: “ndonëse vendet e rajonit kanë arritur të hartojnë tashmë projekte të përbashkëta, nevojitet mbështetja e BE-së për sigurimin e instrumenteve financiarë”. 

Duke evidentuar rëndësinë që kanë formate të tilla në forcimin e bashkëpunimit dhe të marrëdhënieve dy, tri e shumëpalëshe në rajon, Ministrat ranë dakord që takimi i radhës të mbahet në Beograd. Në kuadër të intensifikimit të bashkëpunimit në fushën e sigurisë energjetike, Ministrat ranë dakord që së shpejti të zhvillohet një takim tripalësh i Ministrave të Energjisë. 

Më herët, Ministri Bushati pati gjithashtu takime dypalëshe me homologët e tij italian Paolo Gentiloni dhe atë serb Ivica Daçiç. Gjatë këtyre takimeve u diskutuan çështje të ndryshme të bashkëpunimit dypalësh e shumëpalësh, zhvillimet rajonale e më gjerë.