Ministri i Punëve të Jashtme Ditmir Bushati mori pjesë në Takimin e Nivelit të Lartë të sesionit të 31-të të Këshillit për të Drejtat e Njeriut, i cili po zhvillon punimet në Gjenevë. Shqipëria, anëtare e këtij Këshilli për herë të parë që prej janarit të vitit 2015, mbetet e përkushtuar për të punuar së bashku me anëtarët e tjerë, për t’i dhënë formë aksionit global mbi mbrojtjen dhe promovimin e të drejtave dhe lirive themelore të njeriut.

Ministri Bushati ritheksoi objektivat e Shqipërisë, si anëtare e KDNJ-së, sa i përket respektimit të të drejtave të pakicave, bashkëjetesës fetare, shtetit ligjor, luftës kundër korrupsionit, angazhimit për të ulur pabarazinë gjinore dhe promovimit e mbrojtjes së të drejtave të fëmijëve. Në fjalën e tij Ministri Bushati, pasi vlerësoi kontributin e Këshillit dhe Zyrës së Komisionierit të Lartë për të Drejtat e Njeriut mbi mbrojtjen, promovimin dhe respektimin e të drejtave dhe lirive themelore, si dhe për luftën kundër ekstremizmit të dhunshëm, shprehu mbështetjen për pavarësinë dhe integritetin e mandatit të Komisionerit të Lartë për të Drejtat e Njeriut.

Duke u ndalur në krizën e emigrantëve, Ministri Bushati u shpreh se: “përpjekjet e komunitetit ndërkombëtar për përballimin e krizës së refugjatëve duhet të shoqërohen me një vëmendje të veçantë në respektimin e të drejtave të njeriut të emigrantëve”. Në këtë kontekst u evidentua rëndësia e mos lejimit që migrantët, të cilët largohen për shkak të mos respektimit të të drejtave të njeriut, të përballen me mungesën e respektimit të këtyre të drejtave në vendet e tranzitit dhe ato pritëse. 

Gjatë fjalës së tij Ministri iu referua akteve terroriste të vitit të shkuar të cilat kanë krijuar një gjeografi të re të pasigurisë kolektive, duke u shprehur se: “Harmonia fetare gjendet në rrezik në shumë pjesë të botës. Por harmonia fetare nuk është thjeshtë një utopi por një projekt shoqëror i arritshëm siç ka dëshmuar dhe rasti i Shqipërisë”. 

Duke u ndalur në luftën kundër ekstremizmit të dhunshëm Ministri Bushati u shpreh se: “Shqipëria mbetet e angazhuar si anëtare e grupit iniciator për parandalimin dhe luftën kundër ekstremizmit të dhunshëm edhe nëpërmjet programeve zhvillimore dhe edukative”. 

Ministri Bushati parashtroi përpara të pranishmeve forcën e harmonisë fetare në Shqipëri, si një model inkurajues, i vlerësuar ndërkombëtarisht edhe nëpërmjet organizimit të Samitit me temë “Paqja është gjithnjë e mundur”, mbajtur në muajin shtator të vitit të shkuar në Tiranë