Gjatë një vizite zyrtare në Greqi, Ministri i Brendshëm i Republikës së Shqipërisë, z. Bledar Çuçi - i shoqëruar nga një delegacion zyrtarësh të lartë të kësaj ministrie, si dhe Ambasadorja e Republikës së Shqipërisë, znj. Luela Hajdaraga - u prit në një takim nga Ministri për Migracionin dhe Azilin i Republikës Greke, z. Notis Mitarachi.

Në një frymë miqësore, Ministrat Çuçi dhe Mitarachi u ndalën veçanërisht tek komuniteti shqiptar në Greqi, si një komunitet i madh, i mirë-integruar dhe me një kontribut të çmuar në ekonominë vendase. Ministri Çuçi preku disa nga problematikat që shqetësojnë këtë komunitet, një nga të cilat lidhet me lejet e qëndrimit. Lidhur me këtë, Ministri Mitarachi dha premtimin se komuniteti shqiptar në Greqi do të marrë një trajtim të veçantë për sa i përket lehtësimit të procedurave për marrjen e lejeve të qëndrimit, dhe në përgjithësi të gjithë trajtimit të tij në zyrat e emigracionit në Greqi. Në takim u arrit të vendoset një komunikim i drejtëpërdrejtë për çdo shqetësim të komunitetit shqiptar, përmes Ambasadës së Shqipërisë në Athinë.      

Në takim, u diskutua gjithashtu mbi ecurinë e bashkëpunimit dypalësh dhe forcimin e mëtejshëm të tij, në kontekstin edhe të sfidave me të cilat përballen aktualisht të dy vendet, me theks të veçantë në forcimin e kontrollit të kufijve, flukset migratore dhe luftën kundër migracionit të paligjshëm, situatën në Ukrainë dhe zhvillimin e regjimit të mbrojtjes së përkohshme për ukrainasit e shpërngur, migracionin legal dhe lehtësimin e skemave të dhënies të lejeve të qëndrimit për shtetasit e huaj në të dy vendet, në përputhje me direktivat evropiane.