Ministri në Detyrë Cakaj zhvilloi një takim në Austri me homologen Karin Kneissl.
Në përfundim të takimit me homologen e tij Austriake Cakaj u shpreh se Austria do ta mbështesë Shqipërinë në integrimin e saj Evropian. Ministri në Detyrë Gent Cakaj, tha se Austria do t’i ofrojë Shqipërisë mbështetje diplomatike dhe teknike për kryesimin e OSBE-së që do të marrë Shqipëria në vitin 2020.
Gjithashtu Cakaj bëri me dije se fokusi i takimit ishte edhe rritja e bashkëpunimit dypalësh në fushën e ekonomisë, veçanërisht për rritjen e investimeve të huaja në Shqipëri.

Ministri në Detyrë për Evropën dhe Punët e Jashtme Gent Cakaj, zhvilloi një takim me ZëvendësPresidentin e Fondacionit Heritage, James Carafano dhe grupin e ekspertëve të këtij fondacioni për çështjet e politikës së jashtme, sigurisë dhe ekonomisë.
Takimi kishte për qëllim shkëmbimin e mendimeve rreth zhvillimeve gjeopolitike të rajonit të Ballkanit, sfidat me të cilat përballet rajoni dhe domosdoshmërinë e vëmendjes dhe prezencës së SHBA në rajon.

Një takim i frytshëm dhe një diskutim i hapur mes Ambasadorit Ilir Tepelena dhe Sekretares të Shtetit, Gabriela M. Voicila, në Ministrinë rumune për Mjedisin e Biznesit, Tregëtinë dhe Sipërmarrjen, lidhur me mundësinë e nxitjes dhe identifikimit të përbashkët të mundësive të reja në bashkëpunimin në fushën e tregëtisë dhe ekonomisë mes Shqipërisë dhe Rumanisë.

Ministri në Detyrë për Evropën dhe Punët e Jashtme, Gent Cakaj mori pjesë në punimet e Ministerialit të jashtëm të NATO-s, i cili u mbajt në Uashington me rastin e 70 vjetorit të themelimit të Aleancës së saj.
Të mërkurën në mbrëmje ministrat u mblodhën në Andrew W.Mellon Auditorium, salla në të cilën 70 vjet më parë u firmos Traktati i Aleancës se Veriut. Aktiviteti shënoi festimin e 7 dekadave paqe, prosperiteti dhe sigurie për afro 1 miliardë njerëz të hapësirës Euro-Atlantike, si dhe një mundësi për të parë të ardhmen sëbashku.