Xhaçka – Korčok: Shqipëria përmbushi detyrimet, hapja e negociatave rrit besueshmërinë e BE

10.02.2021 - Ministrja për Evropën dhe Punët e Jashtme, Olta Xhaçka, priti në një takim Ministrin për Punët e Jashtme dhe Evropiane të Sllovakisë, Ivan Korčok.
Ministrja Xhaçka vlerësoi Sllovakinë për mbështetjen e vazhdueshme që i ka dhënë proceseve integruese të Shqipërisë. Sipas saj, hapja e negociatave do të përbënte një vlerësim të merituar të Shqipërisë.
“Ndava me kolegun kënaqësinë tonë me vlerësimin që i bëri Shqipërisë Indeksi i Demokracisë 2020 i Economist Intelligence Unit, duke e nxjerrë nga lista e regjimeve hibride dhe klasifikuar si një demokraci me të meta. Ky është një lajm i mirë që vjen pas reformave modernizuese dhe europianizuese që ne kemi ndërmarrë. Ky është po ashtu një zhvillim që tregon se çfarë fuqie transformuese ka për rajonin tonë objektivi i integrimit evropian dhe sa e rëndësishme është që ky objektiv të bëhet i prekshëm e i arritshëm dhe të mos bjerë viktimë e politikave të brendshme dhe vlerësimeve subjektive”, tha ministrja Xhaçka në deklaratën e përbashkët për shtyp.
Gjithashtu, ajo i kërkoi homologut sllovak që të marrë në konsideratë mundësinë e lejimit të një zyre përfaqësimi të Kosovës në Bratislavë. Sipas ministres Xhaçka, kjo do të shërbente si një tregues i vullnetit të mirë dhe i mbështetjes së procesit aq të vështirë të dialogut mes Kosovës e Serbisë.
Lidhur me çështjen e Kosovës, ministri Korčok deklaroi se po ndiqet nga afër dialogu Kosovë-Prishtinë.
“Z.Lajcak po bën gjithshka për të arritur zgjidhjen e duhur”, deklaroi ai.
Në fjalën e tij, ministri Korčok, u ndal në interesimin që Sllovakia po i kushton çështjes së integrimit të Ballkanit Perëndimor në BE. “Dua t’ju përgëzoj për ecurinë dhe progresin e dukshëm. Shpresoj që si Shqipëria dhe Maqedonia e Veriut, gjatë presidencës portugeze, të marrin miratimin për hapjen e konferencës së I-rë ndërqeveritare”, u shpreh ai.
Ministrja Xhaçka falënderoi qeverinë sllovake për donacionin prej 30.000 eurosh për një nga spitalet Covid në Shqipëri, në shenjë solidariteti në luftën ndaj pandemisë globale COVID-19, donacion i cili i’u dorëzua asaj gjatë vizitës së ministrit sllovak për Punët e Jashtme dhe Evropiane.

Adresa

Ambasada Shqiptare
Str.Duiliu Zamfirescu no.7,
Sector1 , Bucuresti

Tel / Fax

Tel.: +40212119829
Fax.: +40212108039
Numri i emergjences: +40 733368444

E-MAIL

embassy.bucharest@mfa.gov.al

Orari zyrtar

E hënë- E premte
09:00 - 17:00