Shqip
English 
Ελληνικά
Ambasadorja e Republikës së Shqipërisë, znj. Luela Hajdaraga, e shoqëruar nga Oficerja Koordinuese për Diasporën, znj. Joneda Dodaj dhe Kryetari i shoqatës “Zëri i Emigrantit në Rodos”, z. Ari Kasapi, janë pritur në një takim nga Kryetari i Bashkisë së Rodosit, z. Andonis Cambourakis.
Gjatë takimit është diskutuar për forcimin e bashkëpunimit në nivelin e pushtetit vendor, për integrimin sa më të mirë të komunitetit shqiptar me banim në Rodos, për zgjerimin e bashkëpunimit midis qytetit të Rodosit dhe Shqipërisë në fushën e turizmit dhe atë ekonomike, për adoptimin e praktikave më të mira për zhvillimin e investimeve, si dhe për të punuar së bashku me projekte konkrete.
Ambasadorja Hajdaraga, pasi falënderoi Kryetarin për mbështetjen e Bashkisë për komunitetin shqiptar në Rodos, kërkoi një mbështetje dhe më të madhe në drejtim të krijimit të lehtësirave për ruajtjen e gjuhës dhe kulturës shqipe, përmes lëshimit të ambjenteve të posaçme për zhvillimin e kursit të mësimit plotësues të gjuhës shqipe dhe ambjenteve për zhvllimin e aktiviteteve kulturore.
Kryetari i Bashkisë premtoi plotësimin e kësaj kërkese.
Në takim morën pjesë gjithashtu, Nënkryetari i Bashkisë dhe Nënkryetar për Arsimin, Edukimin Parashkollor dhe Imigracionin, z. Stratos Karikis, dhe Këshilltarja e Kryetarit për Cështjet Kulturore dhe Ndërkombëtare, znj. Despina Hatzidiakou.
