Shqip
English 
Ελληνικά
Znj. Luela Hajdaraga, Ambasadore e Republikës së Shqipërisë në Republikën e Tunizisë, me rezidencë në Athinë, i paraqiti Letrat Kredenciale Presidentit të Republikës së Tunizisë, z. Kais Saied, gjatë një ceremonie solemne të zhvilluar në Pallatin Presidencial, në datën 25 maj 2021.
Në fjalën e saj, Ambasadorja Hajdaraga i përcolli Presidentit të Tunizisë përshëndetjet e autoriteteve të shtetit shqiptar, urimet më të mira për Tunizinë dhe popullin e saj, duke shprehur vullnetin për forcimin e mëtejshëm të marrëdhënieve mes dy vendeve.
Gjithashtu, gjatë qëndrimit të saj në Tunizi, Ambasadorja Hajdaraga zhvilloi takime zyrtare me Ministrin e Jashtëm, z. Othman Jerandi, si dhe me Ministrin e Ekonomisë, Financave dhe Investimeve, z. Ali Kooli. Diskutimet u përqendruan tek rritja e bashkëpunimit dypalësh mes dy vendeve, me fokus të veçantë, në fushat e ekonomisë, turizmit dhe të nxitjes së investimeve të huaja.
