Në vazhdim të vizitës në Tokio, zv.Kryeministri dhe Ministri i Punëve të Jashtme, z. Haxhinasto pati një takim me një grup deputetësh të parlamentit japonez (Diet), në përbërje të të cilit ishin z. Naoki Watanabe nga Dhoma e Përfaqësuesve dhe z. Naoki Tanaka dhe Haku Shinkun nga Dhoma e Këshilltarëve. Në takim u diskutua mbi marrëdhëniet dypalëshe, bashkëpunimin ekonomik, atë midis parlamenteve, si dhe zhvillimet në rajonet ku ndodhen dy vendet tona.

Në fjalën e vet z. Haxhinasto vlerësoi marrëdhëniet shumë të mira midis dy vendeve dhe falënderoi për ndihmën dhe asistencën e vazhdueshme që Japonia i ka dhënë Shqipërisë gjatë dy dekadave të fundit, ndihmë e cila ka qenë e përqendruar në sektorë mjaft të rëndësishëm për ekonominë shqiptare. Shqipëria, tha ai, si rezultat i asistencës së komunitetit ndërkombëtar, përfshi Japoninë, si dhe reformave të ndërmarra nga qeveria shqiptare ka patur progres të dukshëm ekonomik. Në këtë kuadër ai ftoi biznesin japonez, që të vijë dhe të investojë në Shqipëri. Shqipëria është porta hyrëse e një tregu rajonal, i cili në të ardhmen e afërt do të jetë pjesë e Bashkimit Evropian.

Në vazhdim, ai ftoi deputetët japonezë që të kontribuojnë për heqjen e vizave për qytetarët shqiptarë për të vizituar lirisht Japoninë. Një kategori që do të fitojë në këtë drejtim është komuniteti i biznesit, dhe më tej, fusha e turizmit do të ketë përfitime direkte. Shqipëria, tha ministri Haxhinasto, ofron mundësi unike për turizmin natyror, por edhe për atë kulturor dhe historik. Shqipëria, vazhdoi ai, duhet të jetë pjesë e hartës turistike të popullit japonez, ndërsa shtoi se shqiptarët lëvizin pa viza në zonën shengen si rezultat i pajisjes me dokumente biometrike, politikave për kontrollin e menaxhuar të kufijve, luftës kundër trafiqeve ilegale dhe krimit të organizuar.

Shqipëria luan një rol konstruktiv në rajonin e Ballkanit, si dhe plotëson detyrimet ndërkombëtare dhe për këtë, mjafton të përmendim kontributin tonë në Afganistan, tha z. Haxhinasto.

Deputetët japonezë falënderuan për ndihmën e popullit shqiptar mbas cunamit të 11 marsit të këtij viti, dhe vlerësuan zhvillimet dhe progresin ekonomik në Shqipëri. Ata u shprehën së vlerësojnë politikën e Shqipërisë në rajon dhe shprehën gatishmërinë për të ndihmuar që të realizohet heqja e vizave për shqiptarët. Po ashtu, ata shprehën angazhimin që të nxisin rritjen e numrit të turistëve japonezë në Shqipëri.

Duke vlerësuar rolin dhe rëndësinë e diplomacisë parlamentare, deputetët japonezë nënvizuan domosdoshmërinë e forcimit të kontakteve dhe shkëmbimeve midis dy parlamenteve, duke mirëpritur vizitat e deputetëve shqiptarë në Tokio.