Gjatë vizitës zyrtare në Japoni, Zv. Kryeministri dhe Ministri i Punëve të Jashtme, z. Edmond Haxhinasto pati një takim me zv. kryetarin e Dhomës së Përfaqësuesve të Parlamentit të Japonisë, z. Seishiro Oto dhe Kryetarin e Grupit të Miqësisë Japoni-Shqipëri, z. Hiroshi Hase.

Zv. Kryeministri dhe Ministri i Punëve të Jashtme, z. Haxhinasto vlerësoi marrëdhëniet shumë të mira që ekzistojnë midis dy vendeve dhe popujve dhe falënderoi për ndihmën e Japonisë në fusha të rëndësishme për popullin dhe ekonominë shqiptare si në infrastrukturë, shëndetësi, energji, burime minerare, etj. Në kuadër të bashkëpunimit dypalësh, tha ai, - mbetet e një rëndësie të posaçme përfundimi i marrëveshjeve që janë në proces, liberalizimi i vizave për qytetarët shqiptare, forcimi i bashkëpunimit ekonomik dhe veçanërisht ai në fushën e turizmit. Marrëdhëniet midis dy vendeve, tha z. Haxhinasto duhet të kenë një zhvillim cilësor në të ardhmen dhe për këtë, mbas përfundimit të projekteve ekzistuese duhet të krijohet më shumë hapësirë për investimet në Shqipëri dhe në rajon. Këtij qëllimi, tha ai do t’i shërbente forcimi i bashkëpunimit në fushën e turizmit, si dhe organizimi i një forumi biznesi Shqipëri-Japoni.

Në vazhdim z. Haxhinasto vlerësoi rolin dhe kontributin e Grupit parlamentar të Miqësisë për forcimin e marrëdhënieve midis dy vendeve dhe falënderoi për njohjen e pavarësisë së Kosovës. Me tej, ai vlerësoi rolin e Japonisë në rajon dhe më gjerë. Dy vendet tona, tha z. Haxhinasto, kanë mjaft objektiva të përbashkëta në kuadër të marrëdhënieve ndërkombëtare dhe këtij qëllimi i shërben edhe mbështetja e kandidaturave reciproke për përfaqësim në organizatat ndërkombëtare.

Zv. Kryetari i Dhomës së Përfaqësuesve japonezë vlerësoi marrëdhëniet midis dy vendeve dhe veçanërisht rolin e Shqipërisë për paqen dhe stabilitetin në rajon. Duke ndarë të njëjtin mendim lidhur me liberalizimin e vizave për qytetarët shqiptarë, z. Eto tha se “keni mbështetjen tonë për këtë gjë dhe shprehu sigurinë se nëpërmjet negociatave dypalëshe një gjë e tillë do të realizohet”. Po ashtu, tha ai, unë jam i bindur se hapja e Ambasadës japoneze në Tiranë do të forcojë ndjeshëm bashkëpunimin ekonomik midis dy vendeve.