Shqip
English 
Ελληνικά
Në Ministrinë e Zhvillimit dhe Investimeve të Greqisë, delegacioni i Kuvendit të Shqipërisë i kryesuar nga z. Taulant Balla, Kryetar i Grupit Parlamentar të Partisë Socialiste, u prit në një takim nga Ministri, z. Adonis Georgiadis.
Në takim u theksua se është momenti që të thellohet akoma më shumë bashkëpunimi ekonomik, si një nga prioritetet kryesore në marrëdhëniet shqiptaro-greke. Të dy vendet mund të bëjnë më shumë në disa fusha si: në bashkëpunimin mes dhomave të tregtisë, në fushën e investimeve, të energjisë dhe sidomos atë të turizmit.
Ministri Georgiadis ra dakord që, në bashkëpunim me Ambasadën Shqiptare, të organizojë një aktivitet me pjesëmarrjen e grupeve të biznesit të të dyja vendeve, në fusha me interes parësor.
Gjithashtu, u nënvizua se Bashkimi Evropian ka shumë projekte për rajonin e Ballkanit Perëndimor dhe se të dy vendet duhet të jenë vigjilente për t’i shfrytëzuar këto projekte, në fushën e energjisë, interkonjeksionit, etj.
