Shqip
English 
Ελληνικά
Me rastin e hapjes së vitit të ri shkollor, Ambasadorja znj. Luela Hajdaraga, së bashku me Oficeren e Diasporës, znj. Joneda Dodaj zhvilloi një takim virtual me mësuesit e kurseve të mësimit plotësues të gjuhës shqipe në Greqi, gjatë së cilit u diskutua mbi mbarëvajtjen e mësimdhënies të gjuhës shqipe, forcimin e bashkëpunimit midis Ambasadës me mesuesit, si dhe u dakordësua mbi koordinimin për zhvillimin e trajnimeve, seminareve dhe projekteve të ardhshme.
Në këtë takim morën pjesë dyzetë e dy mësues, si dhe nderuan me pjesëmarrjen e tyre znj. Mimoza Hysa, Drejtore Ekzekutive e Qendrës së Botimeve për Diasporën pranë MAS dhe znj. Anila Ferizaj, Përgjegjëse e Sektorit për Gjithëpërfshirjen dhe Minoritetin pranë Drejtorisë së Politikave të Arsimit Paruniversitar në Ministrinë e Arsimit dhe Sportit.
Në fjalën e saj, Ambasadorja Hajdaraga shprehu mirënjohje për punën me përkushtim të mësuesve në mësimdhënien e gjuhës amtare, dhe siguroi mbështetjen e pakursyer të Ambasadës për ruajtjen, kultivimin dhe promovimin e gjuhës shqipe, kulturës, traditave dhe vlerave shqiptare.
