Në kuadër të vizitës në Athinë, Zëvendës Kryeministrja dhe Ministrja e Punëve të Jashtme të Kosovës, znj. Donika Gërvalla, zhvilloi një takim mbresëlënës të organizuar nga Udhëheqësi i Zyrës së Interesave të Kosovës në Greqi, z. Fitim Gllareva, me figura të spikatura dhe personalitete të Komunitetit Shqiptar.

Gjatë takimit u diskutua për inkurajimin dhe avancimin e marrëdhënieve mes vendeve, forcimin e bashkëpunimit ndërinstitucional në fushën e arsimit, kulturës, me fokus të veçantë mësimin e gjuhës shqipe.

Duke u ndalur tek rivitalizimi i komunitetit shqiptar pasqyruar në aktivitetet e shumta ekonomike dhe kulturore, të pranishmit ndanë të njëjtin mendim për përmirësimin e dukshëm të shërbimeve konsullore për komunitetin, rritjen e numrit të klasave të mësimit të gjuhës shqipe si dhe shpërndarjen e librave në gjuhën shqipe.

Ambasadorja znj. Luela Hajdaraga, e pranishme në takim, vlerësoi marrëdhëniet mes dy vendeve, ndër të tjera edhe bashkëpunimin me instuitucionet penale për shqiptarët që vuajnë dënimin në këto institucione. 

Për znj. Hajdaraga, fokusi i Ambasadës për 2022 do të jetë bashkëpunimi dhe negociimi me institucionet greke për nënshkrimin e marrëveshjes për pensionet, lehtësimi i procedurave të lejeve të qëndrimit, diplomacia ekonomike, si dhe ngritja e qëndrës kulturore si një vëmëndje e shtuar për komunitetin shqiptar.