Sot në Paris, gjatë punimeve të Sesionit të 38-të të Konferencës së Përgjithshme të UNESCO-s, u shqyrtua kërkesa e Kosovës për anëtarësim në këtë Organizatë.

Ministri i Punëve të Jashtme Ditmir Bushati prezantoi projekt-rezolutën për anëtarësimin e Kosovës para Konferencës së Përgjithshme. 

Në fjalën e tij,  Ministri u shpreh se “një votë pro anëtarësimit të Kosovës në UNESCO nuk është një votë që kërkon të politizojë organizatën. Kërkesa e Kosovës për t'u anëtarësuar në UNESCO ka të bëjë, para së gjithash, me promovimin e vlerave universale përmes arsimit, shkencës dhe kulturës. Është një votë që do t’i japë Kosovës dhe popullit të saj qasje të plotë në punën e vyer të UNESCO-s. Është një votë që do të mbështesë misionin e UNESCO-s."

Ndonëse Kosova siguroi shumicën e mbështetjeve gjatë votimit, nuk arriti të siguronte kuotën e 2/3 të votave të nevojshme.  

Shqipëria është e bindur se procesi i njohjeve ndërkombëtare të Kosovës do të vazhdojë edhe në të ardhmen, sikundër edhe anëtarësimet në organizatat rajonale dhe ndërkombëtare, përfshirë edhe vetë UNESCO-n.

Shqipëria e mbështeti Kosovën në të gjithë këtë proces, në koordinim të plotë me partnerët tanë strategjikë, e bindur se shteti i ri i Kosovës është një realitet i pakthyeshëm. Votimi i sotëm në Konferencën e Përgjithshme të UNESCO-s, me një shumicë dërrmuese në favor të Kosovës, e provoi këtë.